الخطة كالتالي الخليج دول مفيهاش زراعة وبتخاف من نقص الغذاء وقت الأزمات ففكروا في حل ذكي من وجهة نظرهم وقذر من وجهة نظرنا.

قالوا ندعم آبي أحمد عسكرياً وسياسياً واقتصادياً مقابل إن كل دولة فيهم تاخد 2 مليون فدان من أجود الأراضي الإثيوبية بعقد إيجار لمدة 100 سنة 

تخيل يا صاحبي 4 مليون فدان بيتزرعوا بميتك اللي محجوزة ورا السدود عشان المحصول يروح دايركت للخليج بأرخص الأثمان، وإنت هنا في مصر تدوّر على نقطة المية متلاقيهاش ده مش بس استثمار، ده استعمار مائي متغطي بعباءة الأخوة. 

وهنا لازم أسألك سؤال استنكاري يخليك تقف لحظة وتفكر لو الأخ بيدعم اللي عاوز يعطشك وبيشتري الأرض اللي هتتحرم إنت من ريها ده معناه ايه ولا الخليج في انعدمت الخيارات منه بعد الحرب

 بين اللي بيتقال في الإعلام عن العلاقات التاريخية والمصير المشترك وبين اللي بنشوفه على الأرض من صفقات تحت الترابيزة بتخلي إثيوبيا تتحكم في مفاتيح النيل والبحر الأحمر في فجوة محتاجة تفكير مش انفعال الحقيقة المرة إنهم بيحولوا إثيوبيا لسلة غذاء ليهم وفي المقابل ممكن تبلع ميناء عصب وتسيطر على باب المندب يعني قناة السويس هتتخنق من المنبع ومن المصب في وقت واحد 

طب لو الأرقام والواقع غير اللي في بيانات الخارجية مين فينا محتاج يراجع نفسه خصوصا لما تلاقي السعودية سحبت إيدها من ملف السودان وبطلت تسلح الجيش السوداني يبقى الهدف ايه 

السؤال المفتوح اللي لازم تسأله لنفسك دلوقت هل إحنا قدام استثمار اقتصادي زي ما بيقولوا، ولا إحنا قدام كماشة استراتيجية بتبدأ من منابع النيل وبتنتهي عند حيفا 

السعودية والإمارات وقفوا جنبنا في ازمات كتيرة في فترة مصر كانت على الحافة واتمني دي تبقي مجرد تقارير ومافيش تنفيذ على أرض الواقع ممكن يتجهوا للسودان هي أرض خصبة وممكن تأكل الوطن العربي كله انما لو عكس كدة 

فاللعبة مباقتش مخفية يا صاحبي والهدف خطير مصر هتفضل مصر مش مجرد دولة على الخريطة مصر دي العمود الفقري اللي لو اتكسر الخيمة كلها هتقع فوق دماغ الكل 

ده مجرد تحليل للموقف وعرض تقارير واخبار متداولة ربنا يحفظ مصر