و۔ش۔ع  متابعة- محمد مختار

 الاربعاء  25 مارس 2026

تحذير مهم للناس في مصر والبلاد العربية هو ايه اللي هيحصل بكره وبعده في الطقس وليه التحذيرات دي كلها
مصر وبلاد الشام والجزيرة العربية بكره داخلين على حالة من عدم الاستقرار في الجو هتبدأ  بحسب تصريحات الهيئة العامة للأرصاد الجوية بدايةً من ليل الثلاثاء اللي هو النهارده كمان شوية وهتزيد جداً يوم الأربعاء 25 مارس والخميس 26 مارس
طيب أيه السبب العلمي ورا الطقس السيء المتوقع ده بعيدًا عن الهبد والتهويل
السبب علميًا وباختصار هو إن في المعتاد في الوقت ده من العام ومع بداية فصل الربيع بيحصل صدام ما بين بقايا برودة الرياح الشتوية وبداية حرارة الصيف والصدام ده في المعتاد بيخلق حالة من عدم الاستقرار الجوي في الوقت ده من السنة
الجديد بقى هو ان المرة دي في منخفض قطبي جاي من أوروبا هيخبط في كتلة هوائية دافئة ورطبة جاية من المناطق المدارية وده علميًا بيعمل خلل كبير في الضغط الجوي وبيخلي الهواء يبرد ويطلع لفترة فوق وده اللي بيسبب السحب الرعدية الضخمة والبرق والمطر الشديد اللي متوقع اننا نشوفه بدايةً من بكره في أغلب المحافظات
طيب أيه اللي متوقع يحصل نبدأ بمصرتحذيرات هيئة الأرصاد الجوية بتقول إن هيكون في أمطار غزيرة هتستمر لساعات على كل المناطق الشمالية زي الساحل الشمالي  محافظات الدلتا مدن القناة  القاهرة الكبرى  الوادي الجديد والأمطار دي ممكن ترفع منسوب الميه في الشوارع والأنفاق وتعمل فيضانات محلية
وكمان في احتمال كبير لسيول في شمال الصعيد والبحر الأحمر وسيناء وخليج السويس مع رياح شديدة متوقعة ومعاها عواصف رملية هتقلل الرؤية بشكل كبير مع انخفاض في درجات الحرارة بحوالي 3 لـ 4 درجات
لكن المنخفض ده مش هيأثر في مصر بس بل في منطقة واسعة هتشمل دول الشام والجزيرة العربية كمان زي مثلًا الأردن اللي هتشهد برودة شديدة مع حالة عدم استقرار جوي مصنفة من الدرجة الرابعة بالإضافة لأمطار غزيرة ممكن توصل لدرجة السيول المصحوبة برعد وبرق ورياح قوية في فلسطين، ولبنان وسوريا والعراق
وحتى دول الخليج زي البحرين والسعودية والإمارات متوقع تتأثر ببرق وأمطار وأتربة وضباب بداية من يوم الخميس
​بسبب الظروف دي، وزير التعليم العالي المصري قرر تعليق الدراسة في كل الجامعات والمعاهد يومين الأربعاء والخميس 25 و26 مارس وهتتحول الدراسة لنظام الأونلاين وده بهدف تقليل الحركة في الشوارع وتجنب المخاطر اللي ممكن تحصل بسبب المطر والرياح
طيب ماشي نعمل أيه وناخد بالنا من أيه
​خبراء الطقس وهيئة الأرصاد بيحذروا الناس من الخروج إلا للضرورة القصوى ونصيحة لأصحاب العربيات انهم ما يركنوش في أماكن منخفضة أو جراجات تحت الأرض عشان الميه ما تغرقهاش
كمان أصحاب المحلات لازم ياخدوا بالهم ويرفعوا بضاعتهم من على الأرض وبالنسبة لمرضى الحساسية والجيوب الأنفية لازم يستعدوا للعواصف الترابية ويخلوا معاهم كمامات
والتحذير الأهم هو تجنب الوقوف تحت الأشجار أو اليفط الإعلانية الكبيرة عشان الرياح المفاجئة والصواعق الكهربائية اللي ممكن تحصل مع الرعد 
وكمان بالنسبة لإخوتنا في غزة الموجودين في الخيام يخلوا بالهم كويس أوي الساعات اللي جاية ولو أي حد ناصب خيمة تحت أطلال عمارة ينقلها عشان الرياح ممكن توقع كتل اسمنتية تعرض حياة الناس للخطر