و.ش.ع 
متابعة _ محمد مختار  
فضيحة للموساد في إيران فريق من الهاكرز الإيرانيين سرب معلومات عن عملاء الموساد هناك وان أمريكا استولت على سفن جديدة تابعة لأسطول الظل الروسي وبوتين بيرد باستعمال صواريخ قادرة على حمل رؤوس نووية على حدود الناتو وفي وسط كل ده الخطوط الجوية التركية بتلغي رحلاتها كلها لإيران  في وسط أنباء عن طيران روسي بيخرج كميات ضخمة من الذهب من طهران وترامب زود ميزانية الجيش الأمريكي ل 1.5 تريليون دولار وتطورات كتير حصلت خلال ال 12 ساعة اللي فاتوا خلينا كده نمر عليهم سريعًا  بس هنبدأ بكام خبر مهمين جدًا لازم يتقالوا الأول بخصوص غزة واليمن... 
أول خبر هو اللي بيحصل في غزة القطاع للأسف في خلال الساعات اللي فاتت شهد اختراقات صهيونية لاتفاق وقف اطلاق النار في جميع أنحاء غزة والخروقات دي كانت في صورة قصف مدفعي وغارات جوية وبالمسيرات ومعاهم إطلاق نار مباشر والغارات استهدفت منازل ومدارس وخيام نازحين ومناطق زراعية في مناطق زي مخيم جباليا الزيتون شمال غرب غزة خانيونس بني سهيلا المواصي خانيونس رفح البريج النصيرات بيت لاهيا والزوايدة  وخلال الساعات اللي فاتت سقط عدد من الشهداء وصل عددهم لحوالي 14 شخص حسب آخر تقرير للجزيرة، من بينهم 5 أطفال ده غير عمليات إطلاق نار من الزوارق الحربية الصهيونية في بحر رفح وسواحل شمال غزة 
الاختراقات دي كلها لازم منسكتش عليها، ويا ريت ترجع أخبار القطاع تاني تلف السوشيال ميديا عشان للأسف هما معتمدين على ان الناس نسيت أو مشغولين باللي بيحصل في إيران وفنزويلا. 
تاني خبر هو إن السعودية والقوات الحكومية اليمنية الوطنية انتصرت على مخطط الإمارات في اليمن  دلوقتي كامل الأراضي اللي كان مسيطر عليها المجلس الانتقالي الجنوبي تم السيطرة عليها من جانب القوات الحكومية اليمنية، بعد أيام بس من إعلان رئيس المجلس الانتقالي الجنوبي "عيدروس الزبيدي" إنه عايز ينفصل بجنوب اليمن دلوقتي الزبيدي نفسه هرب للإمارات، والقوات اليمنية الشرعية سيطرت ع الأرض كلها... وحاليًا المجلس الانتقالي الجنوبي أعلن رسميًا حل نفسه وكافة هيئاته وأجهزته ومكاتبه في الداخل والخارج  والسعودية أعلنت انهم هيقعدوا على طاولة المفاوضات عشان يتفاوضوا على مطالبهم المشروعة وزير الدفاع السعودي، الامير خالد بن سلمان كتب في سلسلة تدوينات على صفحته في منصة إكس "أصبح لقضية الجنوب مسار حقيقي ترعاه المملكة ويدعمه ويؤيده المجتمع الدولي عبر مؤتمر الرياض، الذي نسعى من خلاله لجمع إخوتنا أبناء الجنوب؛ لإيجاد تصور شامل للحلول العادلة بما يلبي إرادتهم وتطلعاتهم" 
يعني خلاص المخطط الصهيوني لتقسيم اليمن فشل، وبإذن الله يفشل في باقي الأماكن سواء في أرض الصومال أو في إيران وبمناسبة إيران بقى فضيحة كبيرة جدًا للموساد دايرة هناك دلوقتي  مجموعة الهاكرز أو المخترقين الإلكترونيين الإيرانية «حنظلة» أعلنت من كام ساعة إنها كشفت هوية شخص يعتبر هو حلقة الوصل بين الموساد ومثيري الشغب في إيران والعميل ده اسمه "مهرداد رحيمي" وبحسب بيان رسمي من حنظلة على إكس، فهو يعتبر واحد من كبار ضباط الموساد، وهما بقالهم شوية بيراقبوه وصوّروه من قدّام بيته وتتبعّوا تحركاته خطوة بخطوة ومش بس كده دول كمان اخترقوا هاتفه الآمن وقدروا يوصلوا لهوية كل المرتبطين بشبكات الاضطرابات الحالية داخل إيران وسربوا أسماءهم كلها وده ترجمة لجزء من البيان الرسمي وفيه الأسماء  مهرداد أبلغ تحياتنا إلى شارون نازاريان وجورج هارونيان وجوناثان غرينبلات، وأصدقائك في المخابرات العسكرية الصهيونية" ومرفق صور بعض الجواسيس دول  
طبعًا فضيحة غير مسبوقة زي ما انت شايف وغالبا هو ده السبب الحقيقي وراء قرار الحكومة الإيرانية بقطع شبكات الإنترنت امبارح عن البلد، عشان تحاصر الحواسيس دول وتمنعهم من التواصل مع بعض ومع الخارج. 
وده بردو بالمناسبة بيكشفلك ليه "إيلون ماسك" حليف الصهاينة الأكبر، راح وفتح شبكات الانترنت الفضائي ستارلينك Starlink فورًا فوق إيران، بزعم انها "لدعم الثوار الإيرانيين" كل ده عشان يساعد عملاء الموساد على التواصل واستكمال مهمتهم في إثارة الفوضى في إيران أنا بس بربطلك الأحداث كلها ببعضها طب ايه تاني ممكن نربطه بالكلام اللي حاصل ده 
خد عندك الخبر اللي بيقولك ان امريكا راحت واستولت على سفينتين جداد تابعين لأسطول الظل الروسي وهما بيحاولوا يهربوا من فنزويلا والسفينة الجديدة اللي استولوا عليها اسمها "أولينا"، وكانت رافعة علم بتاع دولة اسمها "تيمور الشرقية Timor Leste" عشان تحاول تهرب من مطاردة السفن الأمريكية.. 
بس أمريكا وصلتلها واستولت عليها زي السفينة الروسية الأولانية بالضبط وده بعد ساعات من استيلاءهم على سفينة تانية اسمها "صوفيا" بردو تابعة لأسطول الظل الروسي 
روسيا عمالة تاخد على دماغها من أمريكا اللي بتتجاوز كل الخطوط الحمراء ف تقوم تعمل ايه روسيا 
حكيتلك انا في المقال اللي قبل ده من 12 ساعة راحوا ضربوا صواريخ "أورشنيك Oreshnik" فرط الصوتية (القادرة على حمل رؤوس نووية) لأول مرة بالحجم ده على أوكرانيا وقصفوا بيها مدينة "لفيف" في الشرق الأوكراني على بعد 70 كيلومتر بس من حدود بولندا يعني تصعيد مرعب ضد الناتو وفي خضم ده كله بقى يظهر خبر تاني أغرب، بيقولك ان روسيا أثناء ما هي بتقصف في أوكرانيا، بعتت طيارات شحن لإيران عشان تخرج كميات ضخمة من الذهب من هناك طب مين اللي بيقول كده 
واحد اسمه "توم توغندهات Tom Tugendhat"سابقً وهو عضو في البرلمان البريطاني وكان وزير الأمن البريطاني سابقًا وقال الكلام ده خلال خطاب ألقاه في مجلس العموم البريطاني، مفاده إنه وفقا لمصادر المخابرات البريطانية، فهناك "طائرات شحن روسية تهبط في طهران وتحمل دفعات كبيرة من الذهب من إيران للخارج  
هل روسيا بتأمن على الدهب الإيراني تحسبا لأي سقوط للدولة أو هجمة أمريكية إسرائيلية الله أعلم بس الفكرة ان الخطوط الجوية التركية ألغت رحلاتها بالفعل لإيران، ومعاها دول تانية كمان، وحذروا رعاياهم من السفر لإيران أو البقاء هناك في الفترة الحالية...