و۔ش۔ع 

القاهرة  - محمد مختار

الثلاثاء 03 مارس 2026

امبارح لو تفتكر إن إيران أعلنت رسميًا عدم مسؤوليتها عن قصف مصفاة شركة أرامكو السعودية، وقالت في تصريحات رسمية للخارجية الإيرانية ومسؤوليين عسكريين في الحرس الثوري نقلتها وكالة تسنيم إن إسرائيل هي اللي قصفتها عشان تدخل السعودية غصب عنها في حرب ضد إيران
الجديد بقى إن المذيع الأمريكي العالمي تاكر كارلسون امبارح فجر مفاجأة من العيار الثقيل لما قال في حلقته الأخيرة إن قطر والسعودية ألقوا القبض على خلايا وعملاء للموساد الإسرائيلي كانوا بيخططوا لعمل تفجيرات وعمليات تخريبية بداخل البلد
كارلسون لو انت متعرفوش هو مش مجرد مذيع، ده راجل تقيل وقريب من دوائر صنع القرار في واشنطن وحاليًا هو أهم إعلامي في أمريكا ويمكن في العالم كله، وبقاله فترة بيفضح في إسرائيل وسياستها وهو نفس المذيع اللي زنق السفير الأمريكي في إسرائيل مايك هاكابي من أسبوع كده وخلاه يغلط ويعترف إن اسرائيل من حقها تحصل على أراضي مصر والسعودية والأردن وسوريا ولبنان لتنفيذ مخطط اسرائيل الكبرى
طب ليه خلايا الموساد كانت عايزة تعمل تفجيرات في دول المفروض انها صديقة ليها ولأمريكا؟
إسرائيل يا صاحبي عايزة تولع المنطقة كلها، وعايزة تحط دول الخليج قدام الأمر الواقع، وتقولهم إيران بتضربكم شخصيًا مش مجرد منشآت أمريكية، فـ يالا اضربوا معانا... وعشان كده الخلايا دي كانت بتخطط لتنفيذ عمليات تفجير وتخريب في قلب المنشآت الحيوية في الدولتين، وبعدين ينسبوها لإيران ويورطوا البلدين في حرب ضدها وأنا من عندي أؤكدلك إن دي مجرد الخلايا اللي تم اكتشافها وبنسبة 100% في خلايا تانية زيها في دول زي الإمارات والبحرين وعمان والكويت وغيرهم
القصة دي هتفكرك فوراً بـ فضيحة لافون في الخمسينات في مصر، لما الموساد وقتها فجر منشآت أمريكية وبريطانية عشان يبوظ علاقة مصر بالغرب ويورطنا في صراعات مع أوروبا التاريخ بيعيد نفسه دلوقتي بنفس القذارة.. إسرائيل مش شايفة الخليج حلفاء، بل مجرد أدوات لتنفيذ مصالحهم بس، ومستعدين يضحوا بأمن الخليج كله عشان يضمنوا إن ترامب يلاقي اللي يموله ويقف معاه في حربه المفتوحة ضد طهران بعد ما الأوروبيين رافضين
هما الأوروبيين رافضين بجد
أيوه والله تخيل بريطانيا رافضة تتدخل في الحرب  وعلى لسان رئيس الوزراء البريطاني كير ستارمر من شوية أكد إن إيران لا يمكن إسقاط نظامها بهجمات جوية ولازم تدخل بري، وكان رافض أصلًا يخلي أمريكا تستعمل قواعده ووافق بالعافية امبارح وبشكل محدود جدًا
وأسبانيا رافضة الحرب أساسًا وأدانت أمريكا واسرائيل بسبب هجماتهم على إيران؛ وطردت الطيران الأمريكي من قواعدها العسكرية وفرنسا مش عايزة تتدخل وبدأت تكبر ترسانتها النووية بدلًا من كده
الدولة الوحيدة اللي قالت انها بتفكر تتدخل هي ألمانيا، ولسه لحد دلوقتي مفيش أي إشارات على انها هتعمل كده
يعني أمريكا لأول مرة في تاريخها بتشن حرب في الشرق الأوسط بدون حلفاءها من الناتو وأصلًا الصواريخ والذخائر بتاعتها محدودة على لسان ترامب نفسه من شوية وهسيبلك مصدر تحت وبتاعت اسرائيل كمان محدودة شوي ومحتاجين تمويل ودعم لوجيستي ومحتاجين حد يشيل عنهم الضرب شوية
ومين أفضل من دول الخليج
نلبسهم في إيران بقى وهو ده بالضبط اللي بيحصل
تاكر كارلسون في الحلقة سأل سؤال منطقي جداً ليه إسرائيل تهاجم دول خليجية بتتعرض أصلاً لتهديدات إيرانية مش دول حلفاء والإجابة انا وانت فاهمينها لأ مش حلفاء إسرائيل هدفها إضعاف الكل إيران السعودية قطر الإمارات الكل لازم يقع عشان هي تفضل سيدة المنطقة الوحيدة
إحنا قدام مؤامرة متكاملة الأركان بتلعبها إسرائيل على المنطقة عشان تفرق دمها بين القبائل، ولأول مرة في التاريخ نشوف دول العالم الإسلامي بتضرب في بعضها عشان إسرائيل وأمريكا حرفيًا بيخلونا احنا اللي نخلص على بعض يا ترى إيه الرد الخليجي اللي هنشوفه بعد الفضيحة دي وهل ترامب هيقدر يغطي على وساخة حليفه المدلل